Պահանջվում է պատժել Էգեմեն Բաղըշին

Քաղաքական12:25, 17 Ապրիլ 2012

Պահանջվում է պատժել Էգեմեն Բաղըշին

Հայ-շվեյցարական միջխորհրդարանական խումբը պահանջում է պատժել Հայոց ցեղասպանության փաստը Շվեյցարիայում հերքած Թուրքիայի ԵՄ հարցերով նախարար Էգեմեն Բաղըշին: Հիշյալ խումբը բողոքարկել է Ցյուրիխի դատախազության` Բաղըշի դեմ սկսված հետաքննությունը կարճելու և քրգործ չհարուցելու մասին որոշումը:

Խմբի քարտուղար Սարգիս Շահինյանն ընդգծել է այն հանգամանքի վրա, որ թուրք նախարարը Հայոց ցեղասպանության փաստը հերքել այն ժամանակ, երբ նրա վեր չէր տարածվում դիվանագիտական անձեռմխելիությունը:

Հիշեցնենք, որ Էգեմեն Բաղըշը Դավոսի տնտեսական համաժողովից վերադառնալիս Ցյուրիխում ներկա էր գտնվել մի համերգի, որից հետո հանդիպում էր ունեցել լրագրողների հետ: Այդ ժամանակ էլ ասել էր. «Հայոց ցեղասպանություն չի եղել, դե թող գան ու ինձ ձերբակալեն»:

Քանի որ Շվեյցարիայում Հայոց ցեղասպանության ժխտումը քրեորեն հետապնդվում է, Ցյուրիխի դատախազությունը թուրք նախարարի դեմ նախնական հետաքննություն սկսեց: Որոշ ժամանակ անց նույն այդ դատախազությունը, վկայակոչելով Բաղըշի` դիվանագիտական անձեռմխելիությամբ օժտված լինելու հանգամանքը, հանեց գործը քրեական վարույթից: