Մերկելը ցանկանում է կարգավորել թուրք-գերմանական հարաբերությունները

Քաղաքական09:14, 19 Օգոստոս 2016

Մերկելը ցանկանում է կարգավորել թուրք-գերմանական հարաբերությունները

Գերմանիայի կանցլեր Անգելա Մերկելը թուրք-գերմանական հարաբերությունների կարգավորմանը միտված հայտարարություններ է արել: Թուրքական «Sondakika» լրատվական կայքը, հղում անելով գերմանական ԶԼՄ-ներին, տեղեկացնում է, որ Մերկելը ցանկություն է հայտնել Թուրքիայի հետ լարված հարաբերությունները բարելավել:

«Թուրքիայի հետ մեր հարաբերությունները առանձնահատուկ են: Թուրք-գերմանական հարաբարությունները առանձնահատուկ են դարձնում Գերմանիայում բնակվող 3 միլիոնից ավել ազգությամբ թուրք բնակիչները: Թուրքիայի համար էլ լարված հարաբերությունների փոխարեն պետք է նախընտրելի լինեն լավ հարաբերությունները: Նախագահ Ռեջեփ Թայիփ Էրդողանի հետ հանդիպումները հենց այս ոգով եմ անցկացնում»:

Մերկելը նաև կարևորել է Թուրքիայի դերը սիրիական ճգնաժամի կարգավորման գործում: «Թուրքիան մոտ 3 միլիոն սիրիացի փախստական է ընդունել: Թուրքիան Սիրիայում մարդասիրական աղետի լուծման գործում ամենամեծ ներդրում կատարած երկիրն է»:

Հիշեցնենք, որ թուրք-գերմանական հարաբերությունները սրվել էին, երբ Գերմանիայի խորհրդարանը հունիսի 2-ին ընդունել էր Հայոց ցեղասպանությունը ճանաչող և դատապարտող բանաձև: Ցեղասպանության բանաձևի ընդունմամբ է պայմանավորվում նաև այն, որ Թուրքիան թույլ չի տալիս Գերմանիայի պաշտպանության նախարարության պաշտոնյաներին այցելել ՆԱՏՕ-ի կողմից օգտագործվող թուրքական «Ինջիրլիք» ռազմաբազա և տեսակցել գերմանացի զինվորականների հետ: Աշնանը նախատեսվում է գերմանացի խորհրդարանականների այցելություն «Ինջիրլիք», սակայն Թուրքիայի իշխանությունները դեռևս թույլտվություն չեն տվել, ինչը կոշտ քննադատության է արժանացել Գերմանիայի կողմից:

Աղբյուր` Ermenihaber.am