Թուրքիայի արտգործնախարարը խստորեն քննադատել է Ռուսաստանին ու ԵՄ-ին

09:36, 17 Հոկտեմբեր 2015

Թուրքիայի արտգործնախարարը խստորեն քննադատել է Ռուսաստանին ու ԵՄ-ին

Թուրքիայի արտգործնախարար Ֆերիդուն Սինիրլիօղլուն Ռուսաստանին և Եվրամիությանը (ԵՄ) քննադատող հայտարարություններ է արել:

Թուրքական «Hurriyet» պարբերականի կայքի վկայությամբ՝ Սինիրլիօղլուն մեղադրել է Ռուսաստանին՝ Սիրիայի տարածքում ծավալած ռազմական գործողությունների համար՝ պնդելով, թե դրանք «որևէ կապ չունեն «Իսլամական պետության» (ԻՊ- İŞİD) դեմ պայքարի հետ: Թուրքիայի արտգործնախարարը նշել է, որ Ռուսաստանը «սխալ է գործում» և ընդգծել, որ ինքը դեռ Նյու Յորքում Ռուսաստանի արտգործնախարար Լավրովի հետ հանդիպման ժամանակ զգուշացրել էր. «Թուրքիայի սահմանների մոտ իրականացվող գործողությունները վտանգավոր են, դրանք այնքան լուրջ են, որ ամեն վայրկյան կարող են ողբերգության բերել»:

Անդրադառնալով սիրիացի փախստականների հարցում Եվրամիության կողմից Թուրքիային օգնություն ցուցաբերելու խնդրին՝ Սինիրլիօղլուն մեղադրել է ԵՄ-ին ՝ փախստականների խնդիրը « դեռ նոր հայտնաբերելու» մեջ:

«Թուրքիան այնպիսի երկիր չէ, որ նրա մասին հիշեն միայն դժվարին պահին: Բացի այդ անընդունելի է, որ սիրիացիների համար տրամադրվող օգնությունը փոխհատուցվի Թուրքիայի համար նախատեսված հիմնադրամներից», նշել է Սինիրլիօղլուն:

Աղբյուր` Ermenihaber.am